മലയാളം രചനകൾ

കാശീപുരാധീശ്വരീ ഭിക്ഷാംദേഹി

കൃപാവലംബനകരീ മാതാന്നപൂർണ്ണേശ്വരീ...

അവധിക്കാലങ്ങളിൽ ശ്രീവില്ലയിൽ താമസിച്ചിരുന്ന ഓരോ ദിവസവും തുടങ്ങുന്ന ത് അമ്മൂമ്മയുടെ നാമജപം കേട്ടുകൊണ്ടാണ്.സൂര്യോദയത്തിനു മുൻപ് തന്നെ കുളിച്ച് അലക്കിത്തേച്ച മുണ്ടും നേര്യതുമണിഞ്ഞ് നെറ്റിയിൽ ചന്ദനപ്പൊട്ടും ഭസ്മക്കുറിയും ചാർത്തി നേരെ മണപ്പുള്ളിക്കാവിലേക്ക്....

അമ്മൂമ്മയൂടെ മനോഹരമായ ഫോട്ടോ കണ്ടപ്പോൾ പെട്ടെന്ന് പഴയകാലസ്മരണകൾ മനസ്സിലേക്കിരമ്പി വന്നു...

നമ്മുടെ കൊച്ചു കൊച്ചാഗ്രഹങ്ങൾക്കും കുട്ടിക്കുറുമ്പുകൾക്കും എന്നുമെന്നും കൂട്ടായി നിന്നിരുന്ന നമ്മുടെ പ്രിയപ്പെട്ട അമ്മൂമ്മ.... കുട്ടിബ്യൂട്ടീഷ്യൻമാരായിരുന്ന നമ്മുടെ സൗന്ദര്യപരീക്ഷണങ്ങൾക്കും കേശാലങ്കാരപരീക്ഷണങ്ങൾക്കും മോഡൽ ആവാനും, സിനിമയ്ക്ക് കൂട്ടുവരാനുമെല്ലാം സദാ തയ്യാറായിരുന്നു അമ്മൂമ്മ. സ്വതസിദ്ധമായ ആ പുഞ്ചിരിയോടെ....!

അമ്മൂമ്മയുടെ സ്നേഹവാൽസല്യങ്ങൾ നുകർന്ന് കഥകൾകേട്ടുറങ്ങാൻ നമ്മൾ മൽസരിച്ചിരുന്ന ആ നാളുകൾ...പുരാണകഥകളിലെ ഇതിഹാസപുരുഷൻമാരുടെയും വീരാംഗനമാരുടെയും സുന്ദര ചിത്രങ്ങൾ മനസ്സിലാദ്യം കോറിയിട്ടത് അമ്മൂമ്മ....

ലാളിത്യമാർന്ന ആ ജീവിതശൈലി..നർമരസം തുളുമ്പുന്ന സംസാരം..അമ്മൂമ്മയുടെയും അമ്മാവൻെറയും തമാശകൾ കേട്ടാർത്തു ചിരിക്കുന്ന നമ്മുടെ  പൊട്ടിച്ചിരികൾ, ഇപ്പോഴും കാതുകളിൽ അലയടിക്കുന്നു...

അലക്കിത്തേച്ച മുണ്ടിൻെറയും ചന്ദനത്തിൻെറയും ഗൃഹാതുരത്വമുളവാക്കുന്ന ആ സുഗന്ധം ഇപ്പോഴും ഇവിടെയെല്ലാം തങ്ങിനിൽക്കുന്നതു പോലെ...

മധുരതരമായ ആ സ്മൃതികളിൽ മനസ്സ് സ്നേഹാർദ്രമാകുന്നൂ....

--❊--